Pakistan-in danpawna hnawl list aṭangin JuD leh FIF paih

Pakistan court chuan firfiak-a puan, Hafiz Saeed-a pawl Jamaat-ud-Dawa (JuD) leh Falah-i-Insaniyat Foundation te chu dan pawna hnawla, banned outfits list aṭangin a paih.

Ram hrang hrangte nawrna avang leh, US in Pakistan hnena sipaite chhawmdawlna leh sum lama a puihna a tihtawp hnuah, President hlui Mamnoon Hussain chuan kumin February thla khan Anti-Terrorism Act siamṭhatna tur thupek a siam a, he dan siamṭhatnah hian UN Security Council-in dan pawna a hnawlte chu telh an ni.

UNSC in a hrek list a siamah hian Pakistan-a firfiak pawl- JuD, FIF, Lashkar-e-Toiba, al-Qaeda, Tehreek-e-Taliban Pakistan, leh Lashkar-e-Jhangvi te pawh an tel a ni.

Hafiz Saeed-an banned outfit list-a telh an nih chungchangah petition a thehlut chu Islamabad High Court (IHC)-ah ngaihtuah a ni a, he hunah hian a ukil Raja Rizwan Abbasi leh Sohail Warraich te chuan President-in list-a telhna tura ordinance a siam chu a huntiam a ral tawh a, pawhsei a nih loh bakah act-a chantir turin Parliament-ah pawh pharh a ni lo tih an sawi.

Lashkar-e-Toiba (LeT) dintu zinga mi, Hafiz Saeed hi kum 2009 leh 2017 khan pawn chhuak theiloin, house arrest-a hren a lo ni tawh a, mahse Pakistan court chuan a chhuah tawh a ni.