Ukraine leh Russia ram aiawhte inbe dawn

Ukraine chuan Belarus ramria Russia aiawh nena inbiak a remtih hnuah, Ukraine palaite hian nimin khan an inbiakna hmun tur hi an pan. Inkahhai puan dan tur leh, Ukraine aṭanga Russia sipaite hnuhkir an nih dan tur chungchangte an sawi dawn tih Ukraine President office thuchhuah chuan a tarlang.

Ukraine palai zingah hian defence minister Oleksii Reznikov leh presidential adviser Mykhailo Podolyak-te pawh an tel.

Russia-in Belarus ram chhunga inbiak a rawtna chu Ukraine president Volodymyr Zelensky chuan a lo hnawl tawh a, Belarus ram leilung chu an ram beihna atana hman a nih avangin an pawm lo tih a sawi. Hemi hnu hian Belarus border-a inbiakna neih hi a remti a, Gomel-a Rumyantsev-Paskevich Residence-ah inbiakna hi an nei dawn a ni.

Nimin khan Russia-in Ukraine a beih ni ngana a ni. Ukraine health ministry chuan Russia-in an ram a beihnaa civil mi thi chu 352 an tling tawh tih sawiin, an zingah hian naupang 14 an tel tih a sawi. Russia hian hmar, khawchhak leh chhim lam aṭangin Ukraine hi a bei a ni.

Ukraine khawpui, Kyiv leh khawpui lian pahnihna, Kharkhiv-te chu nimin thleng khan Russia sipaiten an la bei chhunzawm zel a, hmarlama Chrenihiv khawpuia chenna in pakhat chu missile-a kahfuh a ni bawk. Mahse ram pahnihten inremna kawng zawnga inbiakna an neih dawn avangin Russia sipaite hian Ukraine an beihna pawh an thlahdul deuh niin Ukraine sipaite chuan an sawi.