Putin-a'n nuclear force-te inralring turin hrilh

Russia president Vladimir Putin chuan Ukraine chungchangah khawthlang ramte an che na zel nia sawiin, a defence chief-te hnenah nuclear force-te chu inralrin tir turin a hrilh.

Putin chuan, 'Pawn lam mi lo inrawlh tum in awm a nih chuan, tun hma zawnga thil thleng in lo hriat tawh aia nasain a nghawng in tuar dawn a ni," tiin a hma pawhin khawthlang ramte chu a lo vau lawk tawh a ni.

Russia hi khawvela nuclear ralthuam bakah ballistic missile nei ngah ram a ni.

"Khawthlang ramte chu economic huang lamah kan ram lakah dan loa hrekna te an siam a, hei bakah hian NATO ram senior official-te chuan kan ram chungchangah min dodalna thuchhuah na tak tak an siam bawk a ni," tiin Putin chuan defence minister leh Russian armed force-a chief of general staff chu nuclear deterrence force-te a ṭul huna che chhuak thei tura inralrin tir tura a hrilh thu Pathianni khan a sawi.

EU-in Russia lakah an airspace khar
European Union chuan an airspace-te chu Russia lakah an khar vek a, Russia thlawhtheihnate, private jet pawh huam telin, EU ramah an ṭumin an thlawk chhuak thei dawn lo a, EU ram boruakah pawh an thlawh phalsak an ni lo ang.

UK pawhin a airspace chu Russian thlawhtheihnate lakah a khar ve nghal bawk.

Russia airline lian ber, Aeroflot chuan thu leh a awm hma chuan Europe rama a flight zawng zawng chu cancel a nih thu a puang. S7 Airlines pawhin March 13 thleng Europe-a a flight-te cancel a nih thu a sawi bawk.