Sri Lanka PM ban, Parliament titawp lailawk

Sri Lanka President Maithripala Sirisena chuan kar kalta Zirtawpni khan Prime Minister Ranil Wickremesinghe chu ban a, ban a nih tuk hian President chuan November 16 thleng Parliament a titawp rih.

Ranil Wickremesinghe ban a nih hnu hian prime minister atan president hlui Mahinda Rajapaksa chu lakluh nghal a ni. Hetihlai hian Wickremesinghe chuan Sri Lanka Prime Minister a la ni reng tih sawiin, a thawhpui Mangala Samaraweera pawhin ban anih dan chu ram danpui kalh a ni tih a sawi. Wickremesinghe hian Parliament-ah majority an la nei reng tih sawiin, prime minister anga a la awm zui zel tur thu a sawi.

Heitihlai hian PM atana ruat thar, Rajapaksa chuan mipuite chuan an party chu sorkarna siam tura siam an duh leh an ngen thu sawiin, Wickremesinghe-a thlawptute chu democracy leh an ram dante zah turin a ngen. Nimin khan Wickremesinghe chu prime minister official residence chhuahsan turin hriattir a ni.

Wickremesinghe-a kaihhruai ṭangrual sorkar aṭanga United People's Freedom Alliance (UPFA) a inhnuhdawh hnuah politics lama buaina hi a thleng zui a, a hnuah President chuan ṭum li lai prime minister lo ni tawh Wickremesinghe hi banin, a aiah Mahinda Rajapaksa hi a dah ta a ni. He thil thlen lai hian Wickremesinghe hi an ram chhim lam tlawha a zin lai a ni a, Colombo-ah a kir nghal a ni. 

Inrinni khan Parliament Speaker Karu Jayasuriya chu Parliament inkhawm ko a, politics-a an buai mek chinfelna ngaihtuah turin a ngen. Parliament-ah majority nei zawk chu a chiang mai dawn niin a sawi a ni. Sri Lanka parliament website-a a lan danin, Wickremesinghe-a kaihhruai United National Party (UNP) hian seat 225 awmah seat 106 an nei mek a, Sirisena party UPFA hian member 95 an nei a ni. UNP chuan kum 2015-a ram danpui siamṭhatah president chuan prime minister ban turin thuneihna a nei tawh lo niin an sawi a, PM hi Parliament-ah no-confidence vote hmang chauha ban theih a ni, an ti.