Pittsburgh-a synagogue-ah mi 11 kaphlum

US-a Pennsylvania-a Pittsburgh khuaa Tree of Life synagogue-ah kar kalta Inrinni khan Sabath service neih laiin inkhawmte chu mi pakhat silai kengin a pawng kah a, mi 11 a kaphlum. Pawikhawihtu hi man nghal niin, thubuai siamsak nghal a ni.

Synagogue beitu hi kum 46 mi, Robert Bowers a ni a, police-ten an kahletnaa hliam a tuar a ni. Federal prosecutor-te chuan thubuai 29 siamsak a nih thu sawiin, thiam loh chantir a nih chuan thi tura hremna pawh pek a nih theih thu an sawi.

Inrinni-a synagogue beihnaah hian mi 11 an thih bakah midang parukin hliam an tuar a, hliam tuar zingah hian police officer pali an tel. Pawikhawihtu hi zinga service neih laiin assault rifle leh handgun pathum kengin building-ah lutin, silai a hmehpuah dawn hian "Juda mite chu thi vek rawh se" tiin a au niin police-te chuan an sawi.

Minute 20 hnu velah building hi chhuahsanin wat officer-te nen an inkap zui a, hemi hnu hian police-te laka tlanchhiat tumin building-ah hian a tlan kir leh a, police-te nen an inkah hnuah a inpe ta a ni. Hliam a tuar avangin damdawi-inah enkawl mek a ni.

FBI special agent Bob Jones chuan pawikhawihtu hi a hma lamin pawikhawihna thilah a inhnamhnawha hriat a la ni ngai lo tih sawiin, Synagogue a beih chhan hi hriat al a ni lo a, midang thurualpui pawh a nei lo nia a lan thu a sawi.

President Donald Trump chuan synagogue beih a ni chu a dem thu sawiin, building-ah hian armed guard awm se chuan inthahna thlengte hi ven theih a nih a rin thu a sawi a ni.

Khawvel ram hrang hrang hruaitute pawhin Juda mite beih an ni chu an dem thu an sawi a, Israel Prime Minister Benjamin Netanyahu chuan he thil thleng hian a rilru a ti na takzet tih a sawi. German Chancellor Angela Merkel pawhin Juda-te huatna leh beihna thleng ṭhin chu do let tura an ṭantlan a ngai tih a sawi.