Khashoggi case: Saudi Arabia-ah thubuai ngaihtuah a ni dawn

29th October, 2018

Saudi Arabia foreign minister Adel al-Jubeir chuan Saudi journalist Jamal Khashoggi thahnaa inhnamhnawiha rinhlelhte chungthu chu Saudi Arabia ramah ngaihtuah a ni dawn tih a sawi.

Bahrain-a conference neihah he thu hi sawiin, minister chuan Khashoggi thihdan chungchangah khawthlang media-te thu chhuah duh dan chu boruak ṭha lo zawk siam tumna angah a ngaih thu a sawi. Istanbul-a Saudi consulate-a Khashoggi thahnaah hian Saudi lal chhungkua an inrawlh loh thu leh, misual thiltih a nih thu Saudi sorkar chuan a sawi a, Khashoggi chunga thil thleng pawh an hriat ve mai loh thu a sawi a ni.

Mahse Khashoggi hi Saudi sorkar policy sawisel a, langsar taka crown prince Mohammed bin Salman sawisel ṭhin a ni a, hei vang hian a chunga thil thlengah hian Saudi sorkar leh lal chhungkua an inrawlh nia rinhlelhna a tam hle.

Turkey chuan Istanbul-a Saudi journa-list thahnaa inhnamhnawiha puh, Saudi mi 18 te chu Turkey-ah an chungthu ngaihtuah tura thawn tura a duh thu a sawi. Mahse Saudi minister chuan hei hi chhangin, "Heng mite hi Saudi mi an ni a, Saudia Arabia-ah hren niin chhui mek an ni a, an thubuai pawh Saudi Arabia-ah ngaihtuah an ni ang", a ti.

US chuan Khashoggi thah a nih dan kimchang sawi turin Saudi chu a nawr chhunzawm reng a, US Defence Secretary James Mattis chuan Khashoggi ngawih tir tuma rawng taka thah a ni chu an ngaithiam lo tih a sawi. President Donald Trump pawhin Saudi thusawi danah a lungawi tawk lo tih a sawi a, hemi rual hian crown prince-in he inthahna thleng a hre lo nia sawi chu thil awm thei a nih thu a sawi.

Hetihlai hian Khashoggi-a nupui hual, Hatice Cengiz chuan President Trump-an White House-a leng tura a sawmna chu hnar a, Khashoggi thah a nih dan chhui hna chu President hian a ngai pawimawh tawk lo niin a sawi a ni. Cengiz-i chuan Saudi Arabia thuneituten Khashoggi thah an tum tih hria se chuan consulate-ah a kal tir loh tur thu a sawi a, he tualthahna thlenga inhnamhnawihte chu a sang ber aṭanga hniam ber thlenga hremna pe vek turin a phut tih a sawi a ni.