Thlipui tleh vanga tangkhangte thiarchhuak

South Korea sorkar chuan thlipui, typhoon Yutu tleh vanga Northern Marianas thliarkara khualzin tang-khangte a thiarchhuak.

US commonwealth tia sawi, Northern Marianas hi kar kalta Nilaini khan super typhoon Yutu chuan a nuai a, Saipan airport pawh nimin thleng khan khar zui a la ni. He thliarkarah hian South Korean khualzin 1,800 vel zet an tangkhang a, power supply a awm loh bakah thil dang mamawh pawh an tlachham ṭan nia sawi a ni.

SKorea air force official chuan khualzinte thiarchhuak tur hian sipai thlawhtheihna tirh a nih thu leh, ni khatah vawi hnih thlawh tir an tum thu a sawi a, mahse boruak awmdan azirin thlak danglam a la ni thei tih a sawi.

Foreign ministry official-a naupang, tar leh raipuarte hruaichhuah hmasak an nih tur thu a sawi. Inrinni khan a thawh khatna atan khualzinte hi hruaichhuah an ni.

Northern Mariana islands hi UN chuan kum 2017 khan khualzinten an tlawh duh hmun lar chho chak pathumnaah a puang a, a bikin South Korea leh China lam aṭangin tlawhtu an tam thei hle.

Inrinni khan US sipai thlawhtheihna hmangin thlipui tuarte mamawh zualpui chu thiar luh a ni. US Pacific territory-a governor Ralph Torres chuan President Donald Trump chuan thlipui tleh vanga 'chhiatna liantham thleng' puang tura a ngenna chu a pawmsak tawh niin a sawi.