US leh China-in insumdawn tawnna tur inremna ziak dawn
US president Donald Trump chuan China nena an insumdawn tawnna tur atana inremna thawh khatna chu January 15-ah an ziak dawn tih Ohio-a Toledo khuaa campaign rally a neihnaah a sawi.
Nikum December 31 khan Trump chuan a twitter lamah China nena sumdawnna kawnga an thawh dunna tur thawh khatna chu January 15-ah ziah a nih tur thu a lo sawi lawk tawh a, an ziahna hmun tur atan hian White House a nih tur thu pawh a ziak lang a ni.
Ohio-a campaign rally a neihnaah hian Trump chuan China nena sumdawnna kawnga an thawhhona tur hi a len tham dawn avangin thawh dunna tura thu ziaknaa tel turte pawh mi pawimawh chin a nih tur thu a sawi. Insumdawn tawnna atana inremna thawhkhatna (trade deal phase 1)-ah hian ram pahnih inkara chhiah lak tih tlem te, China-in US farm ṭhenkhatte a lei theihna tur te, energy, thilsiam chhuah kawngah te leh intellectual property chungchanga ram pahnihte harsatna sut kiante a tel a ni.
China commerce ministry pawhin thuchhuah siam tawhin China Vice Premier Liu He leh mi pawimawh zual ṭhenkhat chu kar leh hian Washington-ah an kal dawn thu tarlangin, January 13 aṭanga 15 thleng an cham tur thute an tarlang tawh bawk.