Mi 188 chuanna Indonesia thlawhtheihna a tla

Indonesia thlawhtheihna, mi 188 chuanna Lion Air Boeing 737 chu Jakarta aṭanga a thlawh chhuah hnu lawkah tuipuiah a tla.

Flight JT 610 hi Bangka Belitung Island-a Pangkal Pinang pan tur a ni a, mahse airport aṭanga a thlawhchhuah hnu minute 13-ah ground control lamin an be pawp thei lo a, a hnuah tuipuiah a tla tih hriat a ni ta a ni. Thlawhtheihnaa chuangte zingah dam chhuak an awm leh awm loh hriat chian ala ni lo.

Nimina thlawhtheihna tla hi aircraft chi thar, Boeing 737 MAX 8 a ni.

Chhanchhuah hna thawktu, Search and Rescue Agency thupuangtu Yusuf Latif chuan thlawhtheihna hi tuipuiah an zawn mek thu a sawi a, he thlawhtheihnaah hian pilot pahnih leh cabin crew panga bakah, khualzin puitling 178, naupang pakhat leh nausen pahnih an chuang tih a sawi. Hetihlai hian report ṭhenkhatah chuan thlawhtheihnaa chuang hi mi 189 nia sawi a awm bawk.

Handphone leh life vest-te chu tuipui meter 30 vela thukah hmuh an ni a, thlawhtheihna them dang pawh zawn mek an ni. A zawng tur hian lawnglian leh helicopter-te tirh an ni.

Flight JT 610 hi nimin zing, an ram huna dar 6:20 khan Jakarta aṭang hian a thlawk chhuak a ni. Pangkal Pinang chu darkar khat hnua thleng tur a ni a, mahse minute 13 hnuah biak theih lohin an awm ta a ni. Thlawhtheina neitu, Lion Air chuan pilot hi kum 31 mi, Suneja a ni a, tawnhriat ngah tawk tak niin, darkar 6,000 chuang thlawhtheihna a khalh tawh thu Latif chuan a sawi. Co-pilot pawh darkar 5,000 flight experience nei tawh a ni tih a sawi bawk.

Lion chuan nimina thlawh-theihna tla hi kumina siam niin, August 15 aṭang khan airline chuan a hmang ṭan chauh niin a sawi. Single-aisle niin khualzin 210 chin phur thei a ni.

Aviation consultant Gerry Goejatman chuan MAX 8-ah hian hman a nih ṭan tirh atangin harsatna a awm thu sawiin, level flight lamah harsatna an nei nghal niin a sawi.

Kum 2013 kha Lion Air flight 904 chu Bali-a tuipuiah alo tla tawh bawk a, mahse vanneihthlak takin he thlawhtheihnaa chaung mi 108 te chu an him vek a ni. Kum 2004 khan Jakarta aṭanga thlawk chhuak flight 2004 chu Solo City-a a ṭum tur a chesual a, mi 25 an thi a ni.

Kar kalta Inrinni zan khan Leicester, England-ah mi panga chuanna helicopter chu King Power Stadium bulah tlain a kang zui a, helicopter-a chuangte hi an thi vek. An zingah hian Leicester City FC neitu, billionaire Vichai Sivaddhanaprabha pawh a tel.