Sri Lanka President-in PM a ban chhan sawifiah

Sri Lanka President Maithripala Siri-sena chuan prime minister aṭanga Ranil Wickremesinghe ban a, a aia Mahina Rajapakse a dah chhan chu amah thah tuma phiarruknaah cabinet minister pakhat a inhnamhnawih vang tih a sawi.

Pathianni-a TV-a thu sawinaah, President Sirisena chuan investigator-ten mi pakhat thu an zawhfiahnaah amah leh defence secretary hlui thah tuma phiarruknaah cabinet minister pakhat a inhnamhnawih thu leh, a hming pawh a sawichhuah thu a sawi. Hei vang Ranil Wickremesinghe ban a, a kaihhruai sorkar ṭhiahsak mai loh chu thlan tur dang a awm lo a ni, a ti.

President hian Wickremesinghe a ban hnuah prime minister atan president hlui Mahinda Rajapakse chu ruatin, sorkar siam turin a ti nghal a ni. Parliament pawh November 16 thleng atan a titawp rih bawk. President chuan parliament member 225 te chu Rajapaksa kaihhruai sorkar thar chu zawm vek turin a ngen a, hei hi tualchhung politics buaina leh economic lama harsatna an neih mek chinfel theihna tur kawng niin a sawi.

Hetihlai hian US State Department chuan Sri Lanka President hi parliament inkhawm ko vat a, prime minister ban a nih thut avanga buaina awmte chinfel dan kawng ngaihtuah turin a ti. Hemi rual hian pawl hrang hrangte chu buaina leh tharum thawhna lam chawk chhuak zawnga che lo turin a ngen.