Brazil president thlanah far-right candidate a chak

30th October, 2018

Brazil president thar tur thlannaah far-right candidate Jair Bolsonaro chu thlan tlin a ni.

Pathiannia inthlan neihah Bolsonaro hian vote tla aṭangin 55.2% a hmu a, left-wing Workers' Party candidate Fernando Haddad chuan 44.8% a hmu. Brazil hi kum 13 chhung Workers' Party rorelna hnuaiah a awm tawh a, mahse hei hi Bolsonaro hian a rawn thlak dawn ta a ni.

Inthlan dawna cam-paign-naah Bolsonaro hian an rama eirukna umbo leh crime level sang lutuk tihhniam chu a auhla berah a hmang a ni.

Kum hnih kaltaa Brazil President aṭanga Dilma Rouseff-i paihthlak a nih hnuah, conservative Michel Temer chu president-ah dah a ni a, mahse Brazil mipui lakah Temer hi a tla na lo hle. Mipui ngaihdan lakah pawh president kalchhuak tur Temer duhtu hi 2% vel chauh an awm.

President atana thlan tlin a nih tih a hriat hnua amah thlawptute hmaa thu a sawiah, Bolsonaro chuan sorkar rintlak, ram leh a mipuite tana ṭhatna tura thawk siam a tiam. Brazil dinhmun chu an thlak danglam dawn tih a sawi a ni.

President thar hi nak-kum January 1 ah lakluh a ni ang.

Latin America ram hruaitute chuan Bolsanaro lawmpuina hi an hlan nghal a, Argentina President Mauricio Macri chuan hnehna ropui tak niin a sawi a, Chile President Sebastian Pinera pawhin inthlanna thianghlim leh felfai tak an neih avangin Brazil mipuite a lawmpui thu a sawi. Venezuela President Nicolas Maduro pawhin Brazil mipuite a lawmpui thu a sawi bawk. US Preident Donald Trump pawhin Bolsonaro hi biain, a lawmpuina a hlan.

Hetihlai hian sawiseltu lam chuan sipai captain hlui, Bolsonaro rorelna hnuaiah sipai rorelna hnuaia awm lai ang maia mipuite zalenna hreksak a, ram danpui ngaih pawimawh lohna a thlen leh an hlauhthawn thu an sawi. Hei bakah hian hnam tlem leh tenau zawkte dikna chanvo te palzut sak an nih a hlauhawm niin an sawi. Amnesty International pawhin a campaign-naa a auhla aṭangin Bolsonaro rorelna hnuaiah Brazil leilung fa, LGBT, mihang, hmeichhia, activist leh civil society te dinhmun chu a him loh an hlauhthawn thu an sawi bawk.