US-in Mexico ramri-ah sipai 5,200 tir dawn

Central America aṭangin Mexico ram kaltlanga US-a pemluh tumin mi tam takin US an pan mek a, hei vang hian Pentagon chuan Mexico nen an ramri-ah venhim hna thawk turin sipai 5,200 chuang a tir dawn.

US President Donald Trump chuan Central America ramte chu an ram aṭanga US-a pemluh tuma kalte dang tur leh, hruai kir turin alo vau tawh a, an hruai kir lo anih chuan US-in chhawmdawlna a pek ṭhinte pawh tihtawpah hial a vau a ni. Mahse hetichung hian mi sang tel chuan a huhoin US lam hi an la pan mek a ni.

General Terrence O'Shaugh-nessy chuan Operation Faithful Patriol hnuaiah sipaite hi tirh belh an ni tih sawiin, a bikin Texas, Arizona leh California lam an veng uluk zual dawn niin a sawi. April thla khan President Trump-an ramri vengtu dahbelh tura a lo ngen tawh angin Mexico ramri-ah hian National Guard member 2,100 dah an ni tawh a ni.

US-a pemluh tuma a ruala kalte hi US ramri aṭanga km 1,600 vela hlaah an la awm mek a ni. US Customs and Border Protection (CBP) commissioner Kevin McAleenan chuan US thlen nan chuan kar eng emaw zat an la duh dawn niin a sawi.

Gen O'Shaughnessy chuan sipaite hi kar tawp lamah ramri-ah hian tirh an ni dawn tih sawiin, ramri vengtute pui turin helicopter, barrier le razor wire-te dah a ni dawn bawk tih a sawi.

Thawhṭanni khan President Trump chuan a twitter-ah US-a pemluh tuma chhim lam ramri pan mekte zingah hian gang member leh misual tak takte an tel tih a sawi. Dan dik tak hmanga an dil a nih loh chuan US-ah an luh phalsak an ni dawn lo a, hei vang hian an ram lama kir leh mai turin a ti.

President Trump chuan Central America aṭanga US-a luh tuma kalte tan hian tent city siamsak an tum tih a sawi. "US-a inhumhimna an dil a nih chaun, an dilna te ngaihtuah a nih chhunga an awmna tur puan-in kaihsak an tum tih a sawi. Dilna hi pawmsak a nih loh chuan an kir leh mai tur a ni", a ti. Raltlanten US-a awm dilna an thehluh an ngaihtuah chhunga an awmna tur siamna atana sum tam tham tak hman an tum lo tih a sawi.