Indonesia thlawhtheihna tla them hmuh belh zel

Indonesia search team chuan Thawhṭannia-a tuipuia thla, Lion Air thlawtheihna them leh mihring taksa peng ṭhenkhat chu tuipuiah an hmuh belh zel tih an sawi.

Boeing-737 MAX hi Jakarta airport aṭanga a thlawhchhuah hnu minute 13 velah biakpawh theih lohin an awm a, a hnuah tuipuiah a tla tih hriat a ni. Thlawhtheihnaah hian mi 189 an chuang a ni.

Chhanchhuah hna thawktute chuan tuipuiah thlawhtheihna leh a chhunga chuangte ruang zawn hna an thawk nghal a, tuipuiah hian mihring taksa peng ṭhenkhate an hmu tawh a, hengte hi DNA test neihpui turin Jakarta-ah thawn an ni ang. Hei bakah hian pheikhawk, thawmhnaw leh wallet te pawh an hmu bawk.

Indonesian national search and rescue agency hotu Muhammad Syaugi chuan thlawhtheihna pum ber hi hmuh theh thuai an beisei thu a sawi. Thlawhtheihna chetsual chhan hriat theihna tur, cockpit voice recorder leh flight data recorder pawh hmuh a la ni lo.