Term tawpah Merkel-i bang tawh dawn

Germany Chancellor Angela Merkel-i chuan a party, centre-right Christian Democrats (CDU) hnenah a term hman mek a tawp hunah party chairman dinhmun a chuh chhunzawm tawh dawn lo tih a hrilh a, Chancellor term li-na a chelh mek pawh a tawpna tur tih a sawi. Chancellor term hi kum 2021-ah a tawp dawn a ni.

Kum 64 mi, Merkel-i hi kum 2000 aṭang khan CDU chairperson niin, kum 2005 aṭangin Chancellor a ni. Kumin December thla hian Hamburg-a party congress neih turah CDU chairperson hi thlan thar a ni dawn a, he hunah hian Merkel-i chuan chuh a tum tawh lo a ni. CDU party secretary general Annegret Kramp-Karrenbauer, Parliamentary leader hlui Friedrich Merz leh Health Minister Jens Spahn te chuan party hruaitu dinhmun hi chuh an tum thu an sawilang tawh.