Sri Lakna PM thar atan Rajapaksa lalut

Sri Lanka President Maithripala Sirisena-an Prime Minister atana a ruat thar, Mahinda Rajapsaka chu Thawhṭanni khan rinawmna thu tiamtira lakluh a ni a, a rual hian a cabinet member-te pawh lakluh an ni.

PM thar Rajapaksa hian finance ministry a chang a, Sarath Amunguma chu foreign minister atan ruat a ni thung. Cabinet hmasaa Sirisena thlawptu minister eng emaw zat chu an chanpual ngai pek an ni bawk.

Hetihlai hian Prime minister aṭanga ban tak, Ranil Wickremesinghe chuan Parliament-ah majority an la nei niin a sawi a,Parliament session neih a phut thu a sawi. Wickremesinghe chuan amah thlawptute chu vawiin hian Colombo-ah pungkhawm a, PM a nihna aṭanga paihthlak a nih duh lohna lantir turin a ngen. Parliament member 225 zinga 126 te chuan petition ziakin, Parliament speaker hnenah Parliament emegency session ko turin an ngen.