Russia-in a beihnaah Ukraine sipai 70 chuang an thi
Russia chuan Ukraine a bei chhunzawm zel a, rocket hmanga Kharkiv leh Kyiv inkara awm, Sumy region-a Okhtyrka khua a beihnaah Ukraine sipai 70 chuang an thi a, civil mi pawh eng emaw zat an thi tel niin Ukraine thuneitute chuan an sawi.
Sumy Regional State Administration hotu Dmytro Zhyvytskyi chuan an hmelmate hian khawpui chhunga military unit an kap tih sawiin, hmelmate pawh hi beih let ve an ni tih a sawi. khawpui chhungah Russian sipai ruang eng emaw zat hmuh tur an awm a, heng ruangte hi lakhawmin Red Cross hnathawkte chuan an ram lamah an thawn kir dawn a ni, a ti.
Ukraine sipai convoy tam tham tak chuan Ukraine khawpui, Kyiv an pan mek bawk. Satellite image aṭanga a lan danin, Kyiv pana Russian convoy kal hi mel 40 vel zeta thui an awh a ni.
Russia hian Kharkiv khawpui pawh a kap leh a, khawpui laili lai, Freedom Square-a sorkar office awmte a bitum a ni. Missile-in Regional State Administration building hma lam kah a ni a, ring takin a puak zui a, a bul vela car leh thil dang awmte a kang nasa hle.
Ukraine president Volodymyr Zelenskiy chuan Kharkiv khawpui beih a nih leh hnuah, khawthlang ramte hnenah Ukraine-a Russian aircraft thlawh phal lohna, no-fly zone siam dan ngaihtuah turin a ngen. Russia sipaiten Kharkiv khua an beihnaah hian civil mi tam tak an thi tih official-te chuan an sawi.
Russia leh Ukraine-in inremna kawng zawnga Belarus ramri-a high-level talk an neihah inremna an siam thei lo a, mahse inbiakna neih chhunzawm erawh an remti a, a hun erawh an la ruat lo. Russia palai, Vladimir Medinsky chuan darkar nga dawn inbiakna hi neih a nih thu a sawi a ni.
US-in Russian UN diplomat 12 hnawtchhuak
US chuan an rama UN mission hnuaia Russian member 12-te a hnawtchhuak tih Thawhṭanni khan a sawi.
UN-a US mission thupuangtu Olivia Dalton chuan, UN Headquarters Agreement zulzuiin hma an la tih a sawi a, Russian diplomat-te hian an mawhphurhna leh tihtur anga hma an lak loh avangin hnawtchhuak an ni tih a sawi a ni. March 7 hma ngeiin US chhuahsan tura hrilh an ni.
Russian diplomat-te hnawhchhuah an ni chu Russia chuan sawiselin, US-a Russia ambassador Anatoly Antonov chuan UN staff 12-te hmelma ang maia en an ni, a ti. Antonov chuan US chuan UN-a foreign mission-te hnathawhna boruak ṭha siamna turah a hlawhchham leh ta a ni, tiin a sawi.