UN General Assembly-in meeting nei

Russia-in Ukraine a run chungchang leh, Russia hrek a nih dan tur ngaihtuahin Thawhṭanni khan United Nations General Assembly member ram 193-te chuan meeting an nei.

UNGA hian Zirtawpniah hian Russia demna, draft resolution siamah vote an la bawk ang. General Assembly-ah hian eng ram mahin veto an nei lo a, resolution pass tur hian member hmun thuma ṭhena hmun hnihin an thlawp a ngai thung.

UN secretary general Antonio Guterres chuan Ukraine beihna chu titawp tawh tur leh, Ukraine aṭanga Russia sipaite inhnuhkir tura a phut thu a sawi. Ukraine ambassador Sergiy Kyslytsya chuan Russia chetna leh nuclear ralthuam chungchang an sawirik chu 'atna' chi khat a ni tiin, "Ukraine hi a dam khawchhuak zo lo a nih chuan UN pawh a dam zo dawn bik lo," a ti.

Hetih lai hian Russia ambassador Vassily Nebenzia chuan he buaina bul ṭantu chu Russia ni loin Ukraine a nih thu a sawi thung. Ukraine sorkar chuan buaina chhuahna turin bul a ṭan a, 2015 Minsk agreement pawh a takin a kalpui duh lo tiin a sawi.