Wuhan chungchang report-tu kum nga tang dawn

Chinese journalist leh lawyer hlui kum 37 mi, Zhang Zhan chu Wuhan-a Covid-19 hri darh dan chungchang a report avangin man a nih hnuah, kum nga tang tura hrem a ni. 

Zhang Zhan hi Wuhan chungchang a report avang hian May thla khan man a ni. Zhang man a nih hma, February thla khan   hri darh ṭanna, Wuhan chungchang an ziah avangin journalist pathum chu an chin hriat lohin an awm bawk. Mahse April thla khan an zinga pakhat, Li Zehua chuan khunghran a nih thu a rawn sawi a, a hnuah Chen Qiushi pawh sorkar enthlakna hnuaiah a awm mek tih hriat a ni bawk. An zinga pakhat, Fang Bin erawh chu tun thlengin a chin  hriat a la ni lo. 

February thla khan Zhang hi Covid-19 hri hmuh chhuahna leh hri darh ṭanna, Wuhan khuaah hian kalin, report  hrang hrangte a tichhuak a ni. NGO, Network of Chinese Human Rights Defenders (CHRD) in a tarlan danin, a report-ah hian journalist-te khung beh an nih dan te, hri vanga thi chhungte hrek bek an nih dante a tarlang niin a sawi. 

May 14 khan Zhang hi Wuhan aṭang hian a chin hriat loin a awm a, a hnu lawkah Wuhan aṭanga km 640-a hla, Shanghai-ah police-ten an hreng tih  hriat a ni ta a ni. June 19 khan Shanghai-ah man a ni a, man a nih aṭanga thla thum dawn hnu, September 9 khan a lawyer hmuh phalsak chauh a ni. CHRD chuan thla thum lai hren a nih vangin Zhang hian chaw ngheia nawrh a huaihawt thu a tarlang bawk. 

Kar liam ta Zirtawpni khan Zhang hi dan pangngai anga thubuai siamsak a ni chauh a; text, video leh media hrang hrang WeChat, Twitter leh YouTube kaltlanga thudik tawk lo pe chhuakah puh a ni. Hei bakah hian foreign media-ten an interview-na a lo pawm vanga hek ni bawkin,  Wuhan-a Covid-19 hri leng chungchanga a report chu thudik lo niin China sorkar chuan a ngai. 

Heng puhna hrang hrang avangte hian Zhang hi kum nga lai jail tang tura tih a ni ta a ni.