Pfizer Inc.-in Pilot delivery program ṭan dawn

American multinational pharmaceutical corporation, Pfizer Inc. chuan US-a state paliah Covid-19 vaccine, Pfizer vaccine an enchhin chu pilot delivery program a nei ṭan dawn.

A hmaa data an lo tihchhuah tawhah Pfizer’s vaccine hian  90% in Covid-19 hri laka a chhanhim theih thu tarlan a ni. Hei vang hian US state pali, Rhode Island, Texas, New Mexico, and Tennessee-ahte hian pilot delivery program hi neih tum a ni. 

Pfizer hian an vaccine hi a ṭha tawk hle tih tarlang mah se, a rintlak dawn em tih enchhin mek a ni. Pfizer vaccine hi -70 degrees Celsius (minus 94°F)-a dah tur a ni a, vaccine pangngai ho hi 2-8 degrees Celsius (36-46°F)-a dah ṭhin an ni thung.

Pilot delivery program a buatsaih hi a hlawhtlin ngei an beisei thu Pfizer Inc. chuan a tarlang. He vaccine hi emergency atana hman a nih hmain enchinna tawp ber chu November-ah hian neih ṭan an tum a ni. Pfizer Inc. leh a thawhpui BioNTech hian vaccine enchinna an neih mek hi an zawh fel hunah US sorkar hnenah US dollar vaibelchhe 1.95 man hu dose maktaduai 100 an supply ang. 

Thawhṭanni khan Moderna Inc chuan an vaccine enchhin mek chu 94.5% in a rintlak thu an lo tarlang ve tawh bawk a, hei vang hian vaccine hi an peih vat beisei a ni. Pfizer leh Moderna  hian technology thar synthetic messenger RNA hmangin vaccine hi an siam a, a ṭha dawn em tih enchhinna an nei mek a ni. He synthetic messenger RNA hmang hian mihring immune system chu hri do zo thei tura siam tum a ni.