SKorea-in khuahkhirhna tikhauh leh dawn

South Korea chuan thla khat chhung hri leng darh tur venna atana khuahkhirhna siamte a thlahdul hnuah, khauh zawkin kenkawh a ni leh dawn tih nimin khan a sawi. 

Khuahkhirhna khauh zawk hi Ningani aṭangin hman ṭan a ni dawn a, mi 100 aia tam punkhawm khapin, sakhaw biakna hmuna hun hman theih dan pawh bituk a ni a, infiamna hmunah pawh a hmuna leng thei aṭanga 30% chin bak awm phal a ni lo ang. Social distancing dan chu khauh taka kenkawh leh a ni ang.

 

Ram hrang hrangten Covid-19 hri leng thawh khatna an tawrhah khan, South Korea hi hri leng dona kawnga hlawhtling ber ram zingah chhiar tel a ni. Test a neih ṭhat bakah, positive contact pawh an chhui ṭha hle a ni. Hri leng pawhin ziaawm lam a pan tawh a, hei vang hian khuahkhirhna hrang hrang a siamte pawh thlahdul an ni tawh a ni. 

Mahse tun hnaiah ni li chhung hri kai hmuh chhuah thar hi 200 chuang an nih tak zel avangin khauh zawkin hri leng dona kawngah hma lak leh a tum a ni. Prime minister Chung Sye-kyun chuan khuahkhirhna khauh zawk siam hian nitina an khawsakah harsatna pawh a thlen phah ngei dawn a, mahse chet an lak thuai loh chuan chhiatna nasa zawk an hmachhawn thei dawn a  ni tih a sawi. 

Korea Disease Control and Prevention Agency (KDCA) chuan nimin khan hri kai hmuh chhuah thar mi 230 awmin, hei hi September thla  hnu lama ni khata hri kai hmuh tam ber ni a nih thu a sawi. Hri kai hmuh thar zinga mi 202 chu ram chhung aṭanga kai chhawng an ni. Nimin thleng khan SKorea-ah hian Covid-19 kai hmuh tawh hi mi 28,998 awmin, an zinga mi 494 in an thihpui tawh a ni.