November thla laihawl aṭangin Rohingya te hruaikir remti

Bangladesh leh Myanmar sorkar chuan November thla laihawl aṭangin Rohingya Muslim raltlante hruai kir hna thawh ṭan an remti.

Myanmar rama Rakhine state-a sipaiten beihpui an thlak avangin Rohingya Muslim mi nuai sarih chuang zet chu Bangladesh ramah an tlanchhia a ni.

Ram pahnih hruaitute hian Rohingya raltlante hi Myanmar rama hruaikir leh turin inremna siam tawh mah se, tun thlengin a hruaikir hna hi kalpui a la ni lo.

Nilaini khan Dhaka-ah Bangladesh Foreign Secretary Shahidul Hague chuan Myanmar senior foreign ministry official Myint Thu kaihhruai palaite chu kawmin, Rohingya te hruaikir chungchang hi an sawiho a, November thla laihawl aṭanga hruai kir hna thawh ṭan hi an rel a ni.

Myint Thu pawhin raltlante hruaikir dan tur chungchangah inbiakna hlawhtling tak an nei tih sawiin, Myanmar rama Rohingya kir turte pawh an himna turin ruahmanna eng emaw zat an siam tih a sawi.

Hetihlai hian United Nations refugee agency chuan raltlante kir lehna turin Rakhine state dinhmun chu a la him tawk lo hle niin a sawi thung. He bial chhunga mipuite himna tur a la ṭha tawk lo a, bial chhung dinhmun enfiah tura media leh independent observer kalte tan pawh khuahkhirhna siam ala ni tih a sawi. Hei vang hian raltlante hruaikir hna chu hmanhmawh taka kalpui mai chi nia an ngaih loh thu UNHCR thupuangtu Andrej Mahecic chuan a sawi.

Rohingya raltlan tam tak pawhin an thil phut hrang hrangte tihhlawhtlin sak an nih loh chuan kir an duh loh thu an sawi a, an thil phut zingah hian Myanmar citizenship an nih theihna siamsak pawh a tel.