Parliament hawn phutin Sri Lanka-ah nawrh huaihawt

Sri Lanka President Maithripala Sirisena chu Parliament rorel inkhawm ko thuai tura phutin an ram khawpui, Colombo-ah mi tam takin nawrh an huaihawt.

Thawhlehni tlaia nawrh huaihawt chu boruak ṭha taka hnuaiah kalpui niin, he hunah hian prime minister aṭanga paihthlak Ranil Wickeremesinghe leh a party, United National Party (UNP) legislator-te an tel.

Nawrh huaihawtte chuan President chu democracy kalphung zawm a, mipuiten an aiawha an thlan sorkar a dinna tur kawng hawng a, parliament inkhawm ko thuai tura an phut thu an sawi.

PM hlui Wickremesinghe chuan pung khawmte hmaa thu sawiin, PM aṭanga ban a ni chu an ram mipuite chuan an duh lo a, politics buaina chinfel dan ngaihtuah thuai turin President chu a phut tih a sawi. Ban a nih dan chu ram danpui kalh a ni tiin, House-ah majority a la nei tih finfiah turin Parliament Speaker Karu Jayasuriya chu parliament hawng turin a ti a ni.

President Sirisena hian kar kalta Zirtawpni khan Wickremesinghe hi PM a nihna aṭangin a ban a, prime minister thar atan president hlui Mahinda Rajapakse chu a ruat nghal a ni. Thawhṭanni khan PM thar kaihruai sorkar hi lakluh a ni. President hian November 16 thleng atan Parliament a khar lailawk bawk a ni.

Wickremesinghe-a thlawptuten nawrh an huaihawt dawn vang hian Thawhlehni zing aṭang khan Colombo khawpui chhung hmun hrang hrangah police ṭhahnem tham tak duty tir an ni. Mahse buaina liam tham chhuak a awm lo nia sawi a ni.