Pakistan-in Kristian hmeichhe thi tura hremna pek sut

Pakistan court chuan Kristian hmeichhia, Islam sakhua sawichhiaa puha thi tura hremna a lo pek tawh chuan nimin khan a sut.

Asia Noreen-i, Aisa Bibi-i tia hriat chu ṭhenawmte nena an inhauh ṭumin Prophet Muhammad a sawichhia nia puhin kum 2010 khan man a ni. An puhna hi thu dik lo niin sawi mah se man a ni a, kum riat kalta chhung kha a hun tam zawk chu midang pawh theih loha hrek a ni.

Nimin khan Islamabad-a Supreme Court chuan Bibi-in thi tura hremna pek a nih chungchang ngaihtuah ṭha leh tura a appeal-na chu ngaihtuahin, thubuai dang a nei a nih loh chuan a zalen thei tawh tih a sawi ta a ni.

Kum 2009 June thla khan Asia Bibi leh hmeichhe dangte chu Lahore bula Sheikhupura-a thlai an thar laiin tui chungchangah an inhnialbuai a ni. Hmeichhe dangte chuan tui inna atan a no an hmansak a, sakhaw dang betu a nih avangin an tibawlhhlawh tiin an puh. Bibi-i chu Islam-a inlet tura an tih laiin ani hian duh loin Prophet Muhammad chungchang mawi lo takin a sawi niin an puh a ni. A hnuah Bibi-i hi a inah kut thlak zui a ni a, kutthlak a nih hnu hian Islam sakhaw a sawichhe ngei tih pawh a inpuang nin amah puhtute chuan an sawi. Police-ten an man zui nghal a ni.

Mahse Bibi chuan an puhna hi thu dik lo niin a sawi a, hmeichhe dangte nen chuan an inhau ngei a, mahse midang sakhua sawichhiatna lam hawi thu a sawi lo tih a sawi. Mahse Pakistan-a Islam sakhaw dan sawichhiatna khapna hnuaiah thi tura a chungthu relsak a ni. Pakistan-ah chuan Zawlnei Muhammad-a sawichhiat chu thi tura hremna pek theih a ni. Islam zawlnei sawichhiaa puh mi eng emaw zat chu mipui thinrimin an lo tihlum fo tawh bawk.

Fa pali nei, Bibi-i thi tura hremna pek a nih hian khawvel ram hrang hranga Kristian-te a tih thinur hle a, Pakistan ram chhungah ngei pawh he hremna pek a nih dan sawiseltu an awm bawk.