Maldives SC-in President hlui Nasheed manna thupek titawp

Maldives Supreme Court chuan an ram president hlui Mohamed Nasheed-a manna tur thupek tihchhuah chu a titawp a, hei vang hian tunkar tawp lamah Nasheed hi an ramah hian a kir leh beisei a ni.

Prosecutor General office chuan Thawhṭanni khan Supreme Court-ah hian firfiaka chetna inhnamnawiha puhna thubuai thiam loh chantir leh kum 13 tang tura Nasheed hremna pek chu ennawn turin a ngen a ni. Hei hi court chuan ngaihtuahin, Nasheed-a manna leh hremna tur thupek tihchhuah tawh chu court-in a thubuaite a ennawn leh hma chuan tihtawp a ni, a ti.

Maldives rama democracy dan anga hruaitu atana thlan tlin hmasa ber, Nasheed-a hi kum 2012 khan president aṭanga bang tura nawr luih niin, a hnuah thuneihna a chan laia dan kalah judge mantira puhin kum thum tang tura hrem a ni. Kum 2015 khan he thubuaiah vek hian Anti-Terrorism Act hnuaiah kum 13 tang tura hrem leh a ni. Kum 2016 January khan ramdangte nawrna avangin Nahseed hi spinal surgery nei tura UK-a a kal chu Maldives sorkar hian a phalsak a, a awm phalsak chin a tawp hnuah Nasheed hian UK sorkarah political refugee status a dil a, hei hi km 2016 May thla khan UK chuan pein a awm zui ta zel a ni.

September thlaa Maldives ram inthlan neihah khan Nasheed-a thawhpui hnai tak, Ibrahim Mohamed Solih chuan President ṭanglai Abdulla Yameen a hneh a, hei vang hian Nasheed tan pawh an rama kir lehna tur kawng a inhawng ta a ni. Solih-an hnehna a chan hnu hian Maldives court chuan dictator hlui Maumoon Abdul Gayoom leh politics thil vanga mante pawh an chhuah zui bawk.