US-in Ukraine thlawhtheihna chesual a chhui pui dawn

US National Transportation Safety Board (NTSB) chuan thu­chhuah siamin, Nilainia Ukraine thlawhtheihna, Boeing 737-800 chetsualna chungchang chhuinaah Ukrainian Boeing airliner-te an thawhpui tur thu an tarlang.

He thlawhtheihna hi Iran khaw­pui Tehran-a Imam Khoemeini International Airport aṭanga thlawk chhuak a ni a, a thlawhchhuah hnu minute 60-na velah, Parand leh Shahriar inkarah a chesual zui tih Iran Emergency Medical Service chuan a tarlang a ni.

Thlawhtheihna chetsual chhan hi hriatchian la ni lo mah se, he thlawhtheihna chetsual hma lawk khan Iran chuan Iraq-a US sipai hmun pahnih chu ballistic missile-in a kap a ni. Hei vang hian firfiaka chetna avang missile-a kahthlak a nih ringtu an awm nual a, mahse hei hi finfiahna a la awm loh bakah, Iran chuan a pha thung. 

Boeing 737-800 hi US siam a ni a, he thlawhtheihna chetsual chhan chhui tur hian Iran chuan US a sawm thu NTSB chuan an thuchhuah siamah an tarlang. He chetsualna thlengah hian a chhunga chuang zawng zawng, mi 176-te chu an thi fai vek a ni.

Canada prime minister Justin Trudeau chuan intelligence hrang hrang aṭanga thu a dawn danin,  Ira­nian surface-to-air missile kahthlak a nih theih thu sawiin, tum reng vanga kah thlak a ni lo thei tih a sawi.

Hemi a nih avang tak hian chiang taka chhui chian a ngai thu sawiin, Canada mi thi 63 lai an awm avangin Canada mite chuan an zawhna chu chhan an phu hle tih a sawi bawk. Iran dem tur emaw, thutlukna siam nghal tur emaw chuan a la hma deuh tih sawi thungin, intelligence hnen aṭanga a thudawn pawh hi chiang takin a sawi zawm duh lo a ni.