Sri Lanka President-in Parliament session a ko

Sri Lanka President Maithri-pala Sirisena chuan nimin khan Parliament a khar lailawk chu titawpin, karleh Thawhṭanniah parliament session a ko.

President Sirisena hian kar kalta Zirtawpni khan Ranil Wickremesinghe chu prime minister aṭanga banin, Parlia-ment pawh November 16 thleng atan a titawp lailawk a ni. Prime Minister thar atan hian president hlui Mahinda Rajapaksa chu ruatin, Thawhṭanni khan lakluh a ni.

PM thar Rajapaksa leh Sirisena-te hian member 225 awmna Parliament-ah hian thlawptu member 95 chauh a nei a, hetihlai hian Wickremesinghe chuan thlawptu 113 neiin prime minister a la ni reng tih a sawi a, hei hi fiah tura parliament inkhawm ko turin President hi a phut thu pawh a sawi tawh bawk.

Expert-te chuan President-in a hmaa November 16 thleng atana Parliament a tihtawp lailawk chhan hi Wickremesinghe-a lam ṭangte an lama thlem lut tura hun a duh vang niin an sawi. Mahse Nilaini khan Sirisena leh parliament Speaker Karu Jayasuriya te chuan meeting neiin, meeting zawh hnuah karleha parliament session koh a nih tur thu hi a sawi ta a ni.