Turkey-in Saudi journalist thah a nih dan kimchang tichhuak

Turkey chuan October 2-a Istanbul-a Saudi consulate-a Saudi journalist Jamal Khashoggi tihhlum a nih dan nia a hriat chu official statement siamin a tichhuak.

Turkey thuchhuah siamah hian Khashoggi hi consulate a luh veleh hian an lo rekhlum nghal mai nia a lan thu a sawi, mahse a finfiahna erawh a la nei lo.

Kartir lam khan Turkey chief prosecutor Irfan Fidan chuan Khashoggi chungchangah hian Saudi hotute a kawm a, mahse meeting hi a hlawhtling lem lo nia sawi a ni.

Turkey chuan a hma aṭangin Jamal Khashoggi thah dan tur hi ruahman a lo nih tawh avangin, Saudi Arabia Consulate General a luh veleh hian an lo rekhlum nghal mai niin a sawi. Hemi hnu hian a taksa hi chandarh in an tiriral nghal niin a sawi bawk.

Saudi journalist Khashoggi hi US press tana thawkin, Saudi sorkar policy sawisel ṭhin a ni a, October 2 khan a nupui neihna tur atana document pawimawhte la tura Istanbul-a Saudi consulate-a a kal chu a chin hriat zui a ni ta lo a ni. Turkey chuan consulate chhungah hian Saudi agent-ten an lo that niin a sawi a, mahse Saudi Arabia lam chuan hun eng emaw chen chu hei hi phain, consulate aṭang hian him takin a kalchhuak niin a sawi. Mahse a hnuah consulate chhungah thah a ni tih a sawi leh a ni.

Khashoggi thah a nih dan hi tun thlengin hriatchian a la ni thei lo a, a ruang pawh hmuh a la ni lo.

Hetihlai hian Saudi official pakhat chuan Khashoggi hi thah a nih hnuah a ruang hi zamphera tuamin local co-operator hnenah tiriral tura pek a nih thu a sawi.

Saudi Arabia chuan Khashoggi thah a nih dan hi joint investigation neih aṭang chauhin hriat theih a ni dawn tih a sawi a, he thila Saudi Arabia lal chhungkua inhnamhnawiha puhna chu thu dik lo a ni tih a sawi bawk.

Kar hmasa khan Turkey President Recep Tayyip Erdogan chuan Saudi lal King Salman biain, Khashoggi thah a nih dan chhuinaah thawhdun zel an remti a ni.