Pakistan PM-in nawrh huaihawtte inbengdai turin ti

Pakistan Supreme Court-in Kristian hmeichhia, Islam sakhua sawichhiaa puha thi tura hremna pek, Asia Bibi-i a ngaihdam avangin Islam sakhaw kalfawr pawl hrang hrangten lungawi lohna an lantir a, heng mite hi inbengdai tur leh, buaina siam zawnga che lo turin Prime Minister Imran Khan chuan a ti.

PM Khan chuan Asia Bibi chungchanga court thutluka tihchhuah a nih hnuah ram mipuite tan video message tichhuakin, nawrh huaihawtte chu sorkar dodal zawnga eng thil mah ti lo turin a ti a, an ti lui a nih chuan sorkar pawhin a mawhphurhna a kengkawh ve mai dawn a ni, a ti.

Asia Bibi-i ngaihdam a nih vanga lungawi lo hian Islam mi tam tak chuan Islamabad leh Rawalpindi inkalpawhna kawngpuite an dang a, Karachi khawpuiah pawh mipui thinrim hian tyre te halin motor-te an bei zui bawk.

PM chuan nawrh huaihawtte thil tichhia leh kawng dang zawnga an chet chu an remti lo tih sawiin, mipuite leh an thil neihte an venhim sak zel dawn tih a sawi. Hetianga mawi lo taka che a, court rorel dan sawiseltute chu Islam tana thil ṭha titu ni loin, Islam hmelma zawk an ni, a ti. Hemi rual hian PM chuan Pakistan chu Islam hminga din niin, Islam sakhua zirtirna kalh zawnga dan siam theih a ni lo tih a sawi. Court thutlukna chu Islam sakhaw behchhana siam, ram danpui zulzuia siam a ni, a ti.