Malawi court-in Gandhi lim siam tihtawp tir

Malawi court chuan an rama Mahatma Gandhi lim siam hna thawh mek chu sawiseltu lamin Gandhi chu chi inthliarna lam hawi thu sawia an puh avangin a tihtawp lailawk tir .

Gandhi lim siam duh lotu pawl, Gandhi Must Fall group chuan court-ah ngenna thehlutin, Gandhi hian a thuziah pakhatah Africa mite chu mihang te hmuh-sitna ṭawngkama ngaih, 'kaffirs' tiin a sawi a ni, an ti. Mihang an nih avangin Gandhi thusawi dan hi an tan chuan a huatthlalawm hle tih an sawi a ni. An ram tana thil ṭha tur engmah a tihsak lo nia sawiin, mi 3,000 chuangin petition an sign a ni. Hei vang hian Judge Michael Tembo chuan milim siam hna hi a tihtawp tir lailawk a ni.

Gandhi lim siam hi India leh Malawi-in dollar maktaduai 10 hu building deal an siam zingah a tel.

Ram pahnihten inremna an siamah hian Gandhi hming chawi hian Malawi rama sumdawnna hmunpui, Blantyre-ah convention centre siam pawh telh a ni. He milim leh centre hawng tur hian India Vice President Venkaiah Naidu chuan Malawi hi tlawh a tum nia sawi a ni bawk.

High Court chuan Gandhi lim siam hna hi hearing neih leh hma emaw, court thupek thar tihchhuah hma emaw chuan chawlh a ni hrih dawn tih a sawi.