Lion Air thlawhtheihna tla black box hmu

Thawhṭanni-a Indonesia-a Lion Air thlawh-theihna tla black box chu nimin khan West Java province tuipuiah hmuh a ni tih Transport Ministry chuan a sawi.

Ministry thupuangtu Baitul Ihwan chuan diver-ten black box an hmuh thu hi a sawi a, mahse thawlhtheihna tla Boeing 737 MAX 8 flight data recorder nge cockpit voice recorder tih zawk erawh a la sawifiah theih loh thu a sawi.

Jakarta aṭanga Pangkal Pinang pana thlawk, flight number JT 610 hi a thlawhchhuah aṭanga minute 13 hnu lekah ground control aṭanga biak pawh theih lohin an awm nghal a, a hnuah thlawhtheihna hi tuipuiah a tla tih hriat zui a ni. Thlawhtheihnaah hian mi 189 an chuang a, a chetsual chhan hi hriat a la ni lo.

Air traffic controller ten thlawhtheihna an biakpawh theihna hnuhnung ber, West Java province-a Tanjung Karwang tuiah thlawhtheihna tla zawn hna hi thawh a ni a, thlawhtheihna them leh taksa peng ṭhenkhat te, an bungraw ṭhenkhatte hmuh a ni. Indonesia search and rescue agency thupuangtu Yusuf Latif chuan black box aṭang chuan thlawhtheihna chetsual chhan hi hriat theih beisei a nih thu a sawi.