Brazil-in Jerusalem-ah embassy a sawn dawn

Brazil President-elect Jair Bolsonaro chuan Brazil embassy chu Tel Aviv aṭangin Jerusalem-ah sawn a ni dawn tih a sawi.

Jair Bolsonaro chuan hemi chungchang hi a twitter-ah tarlangin, inthlan dawna an campaign-naah an lo sawi tawh angin Brazil Embassy chu Tel Aviv aṭangin Jersualem-ah sawn a ni dawn a ni, a ti. Israel chu sovereign state a ni a, hei hi an zahsak a ngai a ni, a ti. Hetihlai hian he thutlukna hi Palestian mite leh ram eng emaw zatin an sawisel rin a ni.

Bolsonaro hian interview a neihnaah Israel chuan a ram khawpui awmna turin dikna a nei tih a sawi a, Brazil pawhin kum 1960 khan a ram khawpui chu Rio de Janeiro aṭangin Brasilia-ah a lo sawn tawh a ni, a ti.

Israel chuan Jerusalem khaw pum hi a ram khawpuiah a chhal a, mahse Palestinian te chuan Jerusalem khawchhak lam chuan Palestinian ram hran a din huna an ram khawpui turah an dah thung. Israel hian 1967 Six-Day War ah khan East Jerusalem hi a luahsak a, a hnuah a zauh belh leh a ni.

Nikum December thla khan US President Donald Trump chuan Jerusalem chu Israel khawpuia a pawm thu a puang a, kumin May 14 khan Tel Aviv aṭangin US embassy pawh Jerusalem-ah hian sawn a ni zui ta a ni.

Kum 63 mi, Brazil president-elect in Brazil embassy awmna hmun sawn anih tur thu a sawi hi mi tam takin an sawisel nghal a, mahse Israel Prime Minister Benjamin Netanyahu chuan thutlukna ropui tak a ni tiin a fak thung. Netanyahu chuan thuchhuah siam nghalin, Brazil president-elect Jair Bolsonaro chuan thutlukna hriatreng tlak, dik leh phurawm tak a siam a ni, a ti. Bolsanor-a thlan tlin a nih chuan Brazil leh Israel miputie tana inṭhianṭhat leh inzawmna nghet zawk a siam ngei a rin thu a sawi bawk.