Maldives President hlui an ramah kir

Maldives President hlui Mohamed Nasheed chu kum hnih chuang zet ram danga a tlanchhiat hnuah Ningani khan an ramah a kir leh ta.

Nasheed hi President a ni lai, kum 2012-a judge a man tir chungchangah President Yameen Adbul Gayoom kaihhruai sorkar chuan a thuneihna dik lo taka hmang leh, firfiaka thiltihnaa inhnamhnawihah a puh a, kum 2015 khan kum 13 tang tura hrem a ni. Jail-a tantir a nih hnuah inenkawl tura ramdanga a kal phalsak niin, Britain-ah inhumhimna dilin a awm zui ta a ni.

Kumin September 23-a Maldives president thlanna neih takah khan Nasheed-a party, Maldivian Democratic Party candidate Ibrahim Mohamed Solih-a chuan President ṭanglai Yameen Abdul Gayoom chu a hneh a ni. President Yameen-a a chak loh hnu hian court chuan politician jail-a tang eng emaw zat chu bail-in a chhuahtir zui nghal a ni.

Tunkar tir lam khan Supreme Court chuan Nasheed-a hremna lo pek tawh pawh ngaihtuah ṭhat leh a nih hma chu a tihtawp sak bawk a, hei vang hian Nasheed-a hi an ramah hian a kir leh theih phah a ni. Nasheed-a hma hian ramdanga tlanchhia, eptu pawl hruaitu leh vice president hlui pawh Maldives-ah hian an kir tawh bawk