Sri Lanka PM ka la ni reng : Ranil Wickeremesinghe

Sri Lakna Prime Minister aṭang ban tak, Ranil Wickermesinghe chuan Parliament-ah thlawptu a la ngah ber nia sawiin, Prime Minister a la ni reng tih a sawi.

President Maithripala Sirisena chuan kar kal ta Zirtawpni khan Wickere-messinghe hi prime minister a nihna aṭanga banin a cabinet pawh a ṭhiat nghal a, Parliament titawpin President hlui Mahinda Rajapaksa chu prime minister thar atan a ruat a ni.

Thawhṭanni khan PM thar Rajapaksa leh a cabinet ṭhenkhat chu lakluh an ni a, Ningani khan a cabinet member hi lakluh belh leh an ni bawk.

Hetihlai hian Parliament-ah Wickeremeshinge chuan Parliament-ah majority a la nei tih sawiin, ban anih dan chu dankalh a ni tiin a office pawh ala chhuahsan duh lo. Wickeremesinghe chuan, "Ram danpui chuan President hian Parliament-ah thlawptu ngah ber chu Prime Minister atan a ruat ang tih a ni a, chu chu keimah ka ni. House-ah majority ka nei ngei tih finfiah a nih theih nan Parliament inkhawm pawh ko thuai turin ka ngen nghal a ni", a ti.

Wickremesinghe ban a nih aṭang khan a party, United National Party (UNP) mi leh sate chu lungawi loin an ram khawpui Colombo-ah lungawi lohna lantirin an pungkhawm a ni.