US-in Iran hrekna kalpui ṭan dawn

US President Donald Trump-a kaihhruai sorkar chuan kum 2015-a Iran nuclear deal an siam ṭuma Iran hrekna hrang hrang a lo tihtawpte chu vawiin aṭang hian a kalpui leh dawn.

Iran leh World Power ram paruk-ten nuclear deal an siam aṭang hian US chu a inhnukdawk tawh a, hemi hnu hian Iran hrekna pawh kalpui chhunzawm leh a nih tur thu a sawi a ni.

White House chuan an hrekna siam hi Iran ram hrekna siam tawh zinga na ber tur a ni tih sawiin, Iran bakah Iran nen insumdawnna kalpui ramte pawh a huam tel dawn a ni. Hetihlai hian Iran aṭanga oil lei lo tura a ṭhianṭha ramte a ngen hnuah, US chuan ram pariatte chu ngaihnathiamin Iran oil an lei chhunzawm lailawk a phalsak thung.

Iran Supreme Leader Ayatollah Khemenei chuan US chet dan chu a ram hmingṭhatna lo neih tawh leh democracy tihmualphona a nih thu a sawi. Khamenei chuan a twitter ah, US leh Iran chu kum 40 chung zet an inep tawh a, US hian military, economic leh media warfare hmangin kawng hrang hrangin a bei tih a sawi. US President thar chuan America a timualpho a ni tiin, America chu tun hma aiin a chak tawh lo zawk tih a sawi bawk.

US-in Iran hrekna a siam leh tur hian shipping, shipbuilding, finance leh energy lam a huam tel dawn a ni. Iran nena inzawmna nei mimal, company, lawng leh aircraft 700 chuang zet chu he hrekna hian a huam dawn a, bank lian, oil exporter leh shipping company-te pawh an tel bawk.

Hetihlai hian UK, Germany leh France foreign minister-te leh EU foreign affairs hotu Federica Mogherini te chuan thuchhuah inṭawm siamin, US-in Iran hrekna a siam leh chu pawi an ti takzet tih an sawi.