Asia Bibi-i pasalin humhimna a dil

Pakistan court-in thi tura a chungthu a lo relsak tawh, Kristian hmeichhia Asia Bibi-i thiam a chantir avangin Pakistan ram chhunga Islam pawl hrang hrangten lungawi lohna an lantir a, Bibi-i pasal Ashiq Masih chuan Pakistan-a awm zel chu an nunna atan a hlauhawm nia sawiin - UK, US leh Canada-ah humhimna a dil.

Kar kalta Nilaini khan Pakistan Supreme Court chuan Prophet Muhammad-a sawichhia a, Islam sakhua tibawrhbanga puh, Bibi-i chung-thu hi ngaihtuah lehin, thiam a chantir a ni. Mahse Bibi-i hi jail aṭanga chhuah tir a la ni lo.

Bibi-i ngaihdam a nih vang hian Islam pawl hrang hrangin lungawi lohna an lantir nghal a, hei vang hian sorkar pawhin Pakistan ram a chhuahsan a khapsak a ni. Hetihlai hian Bibi-i ukil, Saif Mulook chuan a nunna a derthawng nia sawiin Pakistan a chhuahsan tawh bawk a ni.

Ashiq Masih chuan video message a tihchhuahah, an chhungkaw nunna atan a hlauhthawn thu sawiin, UK prime minister chu pui turin a ngen a, an zalenna tur ngaihtuah sak turin a ngen tih a sawi. Canada leh US hruaitute pawh

ṭanpui turin a ngen bawk. Tuna an dinhmun chu a hlauhawm hle tih sawiin, venghimtu pawh nei loin an biru kual reng niin a sawi. Bibi-i ngaihdam duh loh vanga nawrh huaihawtte chu thuneituten inremna an siam a, ram pawn lama a kalchhuah pawh khapsak a ni tih sawiin, hei hian a tihlau hle tih a sawi. Hei bakah thiam chantir a nihna ngaihtuah ṭha leh tura phuttute chu sorkar chuan lo dan a tum dawn lo tih a sawi bawk.