Russia-in Ukraine khawpuite a bei chhunzawm zel

Russia chuan a ni sarihna atan Ukraine khawpui liante a bei chhunzawm zel a, Kyiv khawpuia chengte hmun danga tlanchhe tura a hriattir hnuah TV tower a bomb zui a, mi panga an thi.

Ukraine khawpui lian pahnihna, Kharkhiv-ah Russia air trooper-te lut tawhin, khawpui chhunga hospital pawh an bei tel niin Ukraine army chuan an sawi. Kharkhiv region head Oleg Synegubov chuan Russia missile kah chhuah chuan khawpui laili lai, residential area leh administration building-te a fuh tih sawiin, mi 21 an thi a, mi 112 in hliam an tuar nia report a ni. Kharkhiv hi Russian border bula awm niin, mi maktaduai 1.4 vel an cheng a, khawpuia cheng tam zawk hi Russian ṭawng hmang an ni.

Russia defence ministry thupuangtu, Igor Konashenkov chuan TV-a thu a sawiah, Russia sipaite chuan Ukraine chhim lama Kherson khawpui an la tawh a, khawpui hi an thununna hnuaiah a awm tawh tih a sawi. Defence ministry chuan an sipaiten beihpui an thlaknaah chenna in, school leh hospital-te an bei tel nia puhna chu a pha a, sipai leh sipai hmunte chauh an bitum niin a sawi.

Russian military convoy, mel 40 zeta thuia inzuite chuan Ukraine khawpui, Kyiv an hnaih tawh hle nia sawi a ni.

Ukraine military official chuan Russia sipaiten Chernihiv bial an beihnaah Belarus sipaiten an pui niin a sawi a, mahse hei hi Belarus president Alexander Lukashenko chuan phain indonaah hian tel ve tumna an nei lo tih a sawi.