Ukraine aṭangin mi maktaduai 1 tlanchhe tawh

Russia-in kar liam ta Ningani aṭanga Ukraine ram a run hnuah, Ukraine aṭangin mi maktaduai khat vel chu himna zawngin ram dangah an tlanchhe tawh niin United Nations chuan a sawi.

UN High Commissioner for Refugees (UNHCR) chuan ram danga tlanchhia hi an la pun zel a rinawm thu leh, mi maktaduai li vel an tlin chho thei dawna a lan thu a sawi.

UN High Commissioner Filippo Grandi chuan, ni sarih chhung lekin Ukraine mi maktaduai khat chu an ram ṭhenawmah an tlanchhia a, hetih lai hian ram chhunga awm mekte pawh thlabar takin an awm a, inbeihna tihtawp a, heng mite hi ṭanpui an ngai a ni, a ti.

February 24-a Russia-in Ukraine a run ṭan ni khan mi 82,000 vel chu ram dangah an tlanchhe nghal a, hemi hnu hian nitin mi nuai khat chuang tlanchhiain, Thawhlehni khan ram danga tlanchhia hi mi nuai hnih dawn an tling a ni, tiin UNHRC chuan a tarlang.

Ukraine aṭanga tlanchhia zinga a zahve aia tam hi Poland ramah kalin, Hungary-ah mi nuai 1.16, Moldova-ah 79,000 leh Slovakia-ah mi 71,200 an lut tawh a ni.