Russia sipaiten Kherson khawpui an la

Russia sipaite chuan Ukraine chhim lama lawngchawlhna khawpui pawimawh, Kherson chu lain, an thununna hnuaiah a awm tawh. Kherson hi Russian sipaiten khawpui lian an lak hmasak ber ani.

Kherson mayor Igor Kolykhaev chuan city council building-ah Russia sipaite awmin, khawpui chhungah curfew an puang niin a sawi. Mayor chuan Russia sipaite chu civil mite kap lo tura ngenin, mi nuai 2.8 vel chenna an khawpuiah hian Ukraine sipai an awm lo tih a sawi. Khawpuia chengte pawh Russia sipaite kaihhruaina siamte chu zawm turin a ngen.

He khawpui hi Dnieper River kama awm a ni a, Russia tan Ukraine ram chhung ril lama luh zel a tumna kawngah military base-a a hman turin he khawpui a lak hi a hmang ṭangkai thei dawn a ni.

Hetih lai hian Ukraine khawpui, Kyiv leh an khawpui lian pahnihna, Kharkiv-te chu Russia sipaite hian an la bei chhunzawm zel. Kharkiv khawpui chu ni ruk chhung chu rocket hmangin an bei tawh a ni. Kyiv khawpui pawh beih chhunzawm reng a nih bakah, he khawpui hual tum hian Russian convoy tam tham takin an pan mek bawk. Kyiv pana kal, Russian military convoy hian mel 40 zet thui an awh nia sawi a ni a, mahse Nilaini aṭang khan heng convoy-te hi che sawn loin an awmna hmunah an ding rih nia sawi a ni a, an din chhan erawh hriat chian a ni lo. Report ṭhenkhat chuan fuel leh ei leh in lam indaih loh avanga chawl rih niin an sawi.

Indonaah Russia sipai 498 an thi tawh
Russia defence ministry chuan Ukraine nen an indonaah Russia sipai 498 an thi tawh a, 1,597 in hliam an tuar bawk niin a sawi.

Defence ministry thupuangtu Igor Konashenkov chuan Russia sipai sang tel an thi tawh nia sawi chu thu dik lo a nih thu sawiin, sipai thi chhungte pawh sorkar chuan an mamawhna anga a pui nghal vek thu a sawi.

Konashenkov chuan inbeih­naah hian Ukraine sipai 2,870 thi tawhin, 3,700 velin hliam an tuar niin a sawi bawk. Ukraine sipai 572 chu Russia sipaiten an man tawh a ni, a ti.

Hetih lai hian Ukraine lam chuan Russia sipai thi zat hi an puan aiin an tam zawk hle niin a sawi ve thung. An sipai thi leh hliam zat Russia-in a sawi hi a dik leh dik lo erawh a sawilang lo.

Ukraine-a State Emergency Service chuan indona a thlen hnuah Ukraine-ah civil mi 2,000 chuang an thi tawh niin a tarlang a, mahse hei hi a dik em tih finfiahna a awm lo thung.

ICC-in Ukraine-a war crime thlen chungchang chhui dawn
International Criminal Court (ICCO) prosecutor chuan Russia-in Ukraine ramah kum 2014 aṭang khan war crime a thlen nia puhna chu chhui a ni dawn tih a sawi.

ICC prosecutor Karim A A Khan chuan court dintu, Rome Statute-a tel ram 39-ten petition an thehluh hnuah hemi chungchang hi chhui a ni dawn tih Nilaini zan khan a sawi a ni. ICC Presidency hnenah pawh a thutlukna hi hrilhin, hma la nghalin evidence-te an lakhawm tih a sawi.

The Hague-a ICC hi kum 2002-a din niin, genocide, war crime leh crimes against humanity chungchanga petition lutte chhuiin, an bawhzui ṭhin.

Ukraine president Volodymyr Zelenskyy chuan Russia siapiten an ram khawpui lian pahnihna, Kharkiv an beiha civil mi eng emaw zat an thih hnuah khan Russia chu war crime thlenah a lo puh tawh a ni.