Hamas-ten Israel dodalna lantir chhunzawm zel tum

Palestinian pawl, Islamic Hamas chuan Israel duh lohna lantirna kawngzawh, anti-Israel March chu neih chhunzawm zel an tum tih sawiin, an thil tum ber a hlawhtlin hma chuan an bei zel dawn tih a sawi.

Gaza Strip-a roreltu, Hamas hruaitu pakhat Issam Daalees chuan Palestinian-te tana kawngzawh buaihsaih hi an pawl leh an thurualpuite huaihawt a nih thu a sawi.

Palestinian-Israel inkara remna kawng zawnga inbiakna chhunzawm a nih theih dan tur ngaihtuahin Thawhṭanni khan Egypt palai chuan Gaza Strip a thleng a, Hamas senior official-te leh Palestinian pawl dang hruaitute kawmin, Israel leh Hamas kaihruai Gaza-a Palestinian pawlte inkara inkahhai puan dan turte a sawipui.

Hetihlai hian Thawhṭanni khan Gaza hmarthlang lam, Israel ramri bulah Palestinian mi tam tak chuan nawrh an huaihawt chhunzawm zel a, Israel sipaite nena an innawr buainaah nawrh huaihawt zinga mi 21 in hliam an tuar niin Palestinian Red Crescent Society chuan a tarlang. Heng zinga mi 13 chu silai muin a fuhte niin a sawi.

Gaza health ministry in a tarlan danin, kumin March 30 aṭanga Palestinian-ten March of Return rally an huaihawt ṭan aṭang khan Israel sipaite chuan Palestinian mi 2,018 kaphlum tawhin, mi 23,000 in hliam an tuar niin a sawi.