Asia Bibi-i ukil Netherland-ah tlanchhia

Pakistan court-in Islam sakhua sawisela puha thi tura hremna lo pek tawh a ngaihdam leh tak, Kristian hmeichhia Asia Bibi-i ukil, Saiful Mulook-a chuan a nunna atan a hlauhthawnawm avangin Netherland-ah a tlanchhia tih a sawi a, Sisi-i awmna chin hi a hriat loh thu a sawi bawk.

Bibi-i thubuai ngaihtuah ṭhat a, thiam chantir a nih avang hian Pakistan ram chhunga Islam pawl hrang hrangin lungawi lohna an lantir a, tharum thawhnate pawh a thleng a ni. Saiful Mulook chuan Pakistan rama United Nations staff-te chuan a nunna atan pawh a hlauhthawnawm tih sawiin, kar kalta Inrinni khan Pakistan ram chhuahsan turin an ti a ni, a ti.

Netherlands a thlen hnua chanchinthar lakhawmtute a kawmnaah, Mulook chuan ama duhthu renga tlanchhia a ni lo tih a sawi a, Bibi-i tello chuan a awm a nuam lo tih a sawi. Mahse amah duhsaktute chuan Bibi-in thiam a chan theihna atana a dinsak avangin Islam firfiakte chuan amah chu an bitum ber tur nia sawiin, tlanchhe turin an nawr tih a sawi.

Mulook chuan Bibi-i chanchin chu a hriat zui loh tu sawiin, Supreme Court-in thiam a chantir hnuah hian tan-in aṭangin chhuah a ni tawh em tih pawh a hre thei lo a, khawi ramah nge inhumhimna a dil dawn tih pawh a hre lo tih a sawi.

Bibi-i thiam chantir a nih vanga lungawi lo hian Pakistan ramchhung hmun hrang hrangah Islamist-ten nawrh an huaihawt a, Pakistan ram chhuahsan phalsak lo turin an phut bawk. Hei vang hian Pakistan sorkar pawhin Bibi-i hi an ram a chhuahsan khapsak a ni dawn tih a sawi a ni.