PM Rajapaksa-an thlawptu a ngah tawk : President Sirisena

Sri Lanka President Maithripala Sirisena chuan Prime Minister atana a ruat, Mahinda Rajapaksa chuan Parliament-ah PM atana thlawptu member 113 a nei niin a sawi.

Hemi hma hian Sri Lanka Parliament Speaker Karu Jaayasuriya chuan President Sirisena-an Prime Minister aṭanga Ranil Wickremesinghe a ban dan leh, Parliament a tihtawp dan chu ram danpui kalh leh democracy kalphung a ni lo tiin a lo sawi tawh a ni. Speaker chuan Rajapaksa-a hian house-ah fiahna a paltlang hma chuan an ram prime minister atan a pawm theih loh tur thu a sawi bawk. 

President Sirisena hian Speaker thusawi hi chhangin, fiahna patlang tura mamawh zat, MP 113 thlawptu an neih thu leh, Wickremesinghe a ban danah ram danpui mil anga ti a nih thu te, a thutlukna chu sut a tum loh thute a sawi a ni. Speaker chuan Rajapaksa-an thlawptu a ngah tawk leh tawk loh finfiah a nih theih nan November 7-ah Parliament inkhawm koh a duh a, mahse President Sirisena chuan November 14-ah a ko ta zawk a ni.

Sri Lanka politics buaina inṭan tirh hian Rajapsaka hian thlawptu MP 96 chauh a nei a, mahse President-in Parliament chawlhtir a, hun a pek chhungin member ṭhenkhat chu inletin Rajapaksa lamah an ṭang tawh a ni. Tunah hian a lamṭang hi member 105 an awm tawh nia sawi a ni.