Japan ramah naupang intihlum an pung

Japan education ministry chuan kum sawm-thum chuang chhungin kum 2016-17 chu an rama naupang leh intihlum an tam ber ṭum a nih thu a sawi.

Kum 2016-17 March thla thleng khan elementary aṭanga high school naupang intihlum hi 250 zet an awm a, a kum hmasa aiin panga-in an tam a, kum 1986 hnua intihlum an tam ber kum a ni.

Naupang tam tak hian chhungkaw lama harsatna an neih thu te, an hmalam hun tura hlauhthawnna an neih leh school-ah tihnawmnah an nih ṭhin thu an sawi fo. Mahse school-te chuan intihlum zinga 140 hian lehkha hnutchhiah pawh an neih loh avangin an intihhlum chhan tak hriat a ni lo tih an sawi thung.

Intihlum zinga a tam ber hi high school kal rual an ni a, Japan-ah hian a tlangpuiin kum 18 an nih thlengin high school hi an kal a ni.

Kum 2015 aṭang khan Japan hi mahni intihlum tamna ram zinga a tel a, mahse thuneituten hma an lak hnuah an rate hi a tlahniam ṭan a ni. Kum 2017 khan ram pumah mahni intihlum hi mi 21,000 an awm a, kum 2003-ah kha chuan mi 34,500 zet an awm a ni. Mahse naupang intihlum rate erawh a la sang hle.