Russia sipaite'n Europe-a nuclear plant lian ber an la
Ukraine thuneitute chuan nimin zing khan Russia sipaiten Zaporizhzhia nuclear power plant, Europe-a nuclear plant lian ber chu an la tih an sawi. He plant an lak hma hian Russia hian complex-a building chu an hal niin an sawi bawk.
Nuclear plant awmnaa building kang hian ram dangte pawh a ti ralkhel hman hle a, mahse thuneitute chuan rei vak loha kangmei chhuak hi ṭhelh mih a nih thu leh, hlauthawn tur a awm loh thu an sawi.
Russia hian Ukraine khawpui Kyiv hmar lama awm, Chernobyl plant hluihlawn tawh pawh a lo la tawh a ni.
Russia foreign minister Sergei Larvov chuan indona thleng meka nuclear war chungchang sawichhuakah khawthlang ram politician-te a puh. Khawthlang ram politician-te ngaihtuahnaah nuclear war chungchang ringawt a vir vel a, hei hi Russian mite ngaihtuahna a ni ve lo, a ti.
Humanitarian corridor siam remti
Russia leh Ukraine aiawh, Ningania inbiate chuan Ukraine khawpui hrang hranga tlanchhia, civil mite ṭanpui leh chhawmdawlna pekna tur atan humanitarian corridor siam an remti.
Ram pahnih aiawhte hi indona a thlen hnua an inbiak ṭum hnihna a ni a, inbiakna hmasa ai chuan hma an sawn zawk a ni.
Russia palai, Vladimir Medinsky chuan Ningania inbiaknaah hian sipaite inbeihna huam chhunga awm, civil mite himna leh chhanchhuah chungchang chu an ngaihtuah pui ber a nih thu a sawi. Humanitarian corridor siam an remti thu hi sawi mah se, eng hunah nge siam a nih dawn erawh a sawi lang lo.
Ukraine palai, Mykhailo Pololyak pawhin a rang thei anga civil mite chhawmdawlna pekna tur hi siam ani dawn tih a sawi a, hmun thlan bikahte inbeihna hi tihtawp lailawk theih pawh a ni ang, a ti.
Ram pahnih palaite hi kar leh lamah an inbe leh ang.
* Russia sipaite chuan Europe-a nuclear plant lian ber, Ukraine rama Zaporizhzhia nuclear power plant chu nimin zing khan an la.
* Ukraine leh Russia aiawhten humanitarian corridor siam an remti.
* Ukraine President Volodymyr Zelenskyy-a'n inremna kawng zawnga inbiakna neihpuiah Russia President Vladimir Putin a sawm.
* President Putin chuan Ukraine-a Russia sipaite beihpui thlakna chu an ruahman lawk angin a kal tih a sawi.
* Kherson khawpui chu Russia thununna hnuaiah a awm tawh a, khawpui dang - Kyiv, Kharkiv leh Mariupol-te pawh Russia hian lak tumin a bei chhunzawm zel.