Zelenskyy-a'n inbiakna neihpuiah Putin a sawm

Ukraine president Volodymyr Zelenskyy chuan Russia president Vladimir Putin chu Ukraine a beihna titawp a, inremna kawng zawnga inbiakna neihpuiah a sawm. Hemi rual hian khawthlang ramte chu Kyiv khawpuia Ukraine sipaite nasa zawka pui turin a ngen nghal.

President Zelenskyy chuan Russia in Ukraine a la a nih chuan, a hnuah Europe ram dangte lak tumin a bei zel thei a ni, a ti.

"Putin hi biak ka chak vang a ni lo. Mahse ka biak a ṭul si a ni. Khawvelin Putin hi an biak a ngai a ni, hei lo chu he indona tihtawpna hi a awm lo," tiin Ukraine President chuan a sawi. Putin chu an ram chhuahsan tawh tur ngenin, eng nge an lakah duh a neih tih a zawt nghal bawk.

Russia sipaite ruahman lawk angin an kal - Putin
Russia president Vladimir Putin chuan Ukraine-a Russia sipaite beihpui thlakna chu ruahman anga a kal thu a sawi. He indonaa Russia sipai thi chhungte hnenah zangnadawmna tam tham tak pek a nih tur thu a sawi.

Putin chuan Ukraine-a Russia hmalakna chu 'special operation' tia sawiin, Ukraine ram luahsak an tumna ni loin, sorkar paihthlak an tumna a ni, a ti. 'Neo-Nazi-te nen kan indo a ni. Russian leh Ukrainian-te chu thuhmun an ni tih ka rinna hi ka titawp ngai lo ang," a ti.

Russia hian Ukraine a beihnaah hian civil mite a bitum lo tih a sawi a, Ukraine sipai zawkte chuan inphenna atan civil mite an hmang niin Putin chuan a puh.