Ukraine President-in NATO a dem ; "Thi an awm a nih chuan nangmahni vanga thi an ni ang"

Ukraine president Volodymyr Zelenskyy chuan Russia-in an ram a bomb chhunzawm zel tur venna atana no-fly zone siam tura a ngenna, NATO hruaitute'n an hnawlsak chu na takin a sawisel.

"Vawiin ni aṭang hian mipui thi an awm a nih chuan nangmahni vanga thi an ni ang. In chak tawh loh leh in inlungrual tawk loh vang a ni," tiin Zirtawpni liam ta khan Ukraine President hian a sawi a ni. An ramin indona a hmachhawn meka khawthlang ramte an inrawlh duh lo chu Russia tan Ukraine ram bomb chhunzawm phalna pekna ang a ni, tiin a sawi.

No-fly zone siam tura Ukraine ngenna hi Zirtawpni khan NATO hian a hnawl a, NATO chief Jens Stoltenberg chuan he indonaah hian ṭangrual pawl hi an tel a nih chuan, Russia nena direct-a indona ang a ni dawn a, hei hian buaina nasa zawk a chawk chhuak thei dawn a ni, a ti. "No-fly zone siam dan awmchhun Ukraine airspace-ah NATO indo thlawhtheihna tirh luh a ngai a, Russia thlawhtheihnate kah thlak a ngai dawn a ni," tiin hei hi an ti a nih chuan Europe khawmual puma indona chhuak thei a ni dawn a, ram tam zawk leh mihringte tana chhiatna nasa zawk a thlen theih dawn avangin Ukraine ngenna hi an hnawl niin a sawi a ni.

Mahse an chhuanlam siam hi Ukraine President chuan a pawm lo tih sawiin, khawthlang ramte inhumhalhna chuan Europe ramin zalenna a sual chu an ngaih pawimawh ber a ni lo tih a tilang a ni, a ti.

Hetih lai hian Russia president Vladimir Putin chuan ram dangten Ukraine-a no-fly zone siam an tum a nih vaih chuan, Europe ram chauh ni lo, khawvel pumin a nghawng hi a tuar ang tiin a lo vau lawk a ni.