Russia-in khawpui 2-ah inkahhai a puang

Russia chuan Inrinni liam ta khan Ukraine chhim lama khawpui pahnih, Mariupol leh Vonovakha-ahte civil mite insasengna hun hawngin inkahhai a puang.

Inkahhai puan chhung hian civil mite chu kawngpui ruahman bikah khawpui an chhuahsan phalsak an ni.

Ukraine lam chuan inkahhai a puan hnuah Russia hian Mariupol leh Vonovakha khawpuite chu a bei reng tho niin a sawi. Hei vang hian heng khawpui aṭanga civil mi hruaichhuah an tumna pawh an ṭhulh niin thuneitute chuan an sawi. Hetih lai hian Russia lam hian civil mite tlanchhuah tumna chu lo dan sakah Ukraine sipaite chu a puh let thung.

Lawngchawlh hmun, Mariupol khawpui hi Russia tan hian a pawimawh hle. He khawpui hi a lak theih chuan Ukraine khawchhak lama inlakhran duhtu pawl, Russia-in a thlawpte chuan kum 2014-a Russia-in a lo lak tawh, Crimea biala Russia sipaite an pui thei dawn a ni. Hei vang hian Russia chuan he khawpui lak hi a tum ngawrh hle.

Russia hian Ukraine khawpui Kyiv leh hmarchhak lama an khawpui lian pahnihna, Kharkiv-te erawh ngawrh takin an bei chhunzawm zel thung a, Russia sipaite hian Kyiv hi an hnaih tawh hle nia sawi a ni a, hmarlam leh khawthlang lam aṭangin he khawpui hi an pan a ni.