US-in Afghanistan leh Iraq-a A sipai dah titlem dawn

United States president Donald Trump chuan office a chhuahsan hmain Afghanistan-a US sipai 4,500 la awm te chu 2,500-a tihtlem a tum thu Pentagon chuan a tarlang a, hei bakah hian Iraq-a US sipai la awm 3,000 chu 2,500 a tihtlem tum a ni tih a tarlang bawk. 

Acting secretary of defense Chris Miller chuan Afghanistan-a US sipai 2,000 chu nakkum January 15-ah chuan lakchhuah hman vek tum a nih thu a sawi a, Iraq aṭangin sipai 500 lakchhuah an ni bawk dawn tih a sawi. Sipaite hi lakchhuah ṭhen an nih hnuah ram pahnihah hian US sipai hi 2,500 ve ve an la awm zui dawn a ni. 

Afghanistan leh Iraq aṭanga US sipai lakchhuah hi President Trump policy zinga mi a ni. Kumin kumtir lam khan US leh Taliban firfiakte chuan inremna an ziak a, kha inremnaah khan ni 135 chhungin US sipai 8,600-te chuan Afghanistan an chhuahsan hman tur a ni tihte chu ziah lan a ni. 

"Afghanistan leh Iraq-ah hian US sipaite chuan remna leh muanna a awm theih nan hna an thawk a, an hlawhtling hle a ni. Hei vang hian kan sipaite hi kan ramah haw tir an hun ve tawh a ni," tiin Miller chuan a sawi.

Afghanistan leh Iraq aṭanga US sipai lakchhuah ṭhen tur hi US ramchhung bakah ram dangah pawh sawiseltu eng emaw zat an awm. Sawiseltu zingah hian Republican member-te pawh an tel.

US sipaite hi lak chhuah an nih chuan inremna kawng zawnga inbe mek, Afghanistan sorkar leh Taliban firfiakte inbiakna kawngah a chhe zawnga nghawng a awm phah theih thu an sawi bawk. 

NATO secretary-general Jen Stolte­berg pawhin US-in sipai lakchhuah a tum chu a la hun lo nia a ngaih thu a sawi a, lakchhuah  hma an nih emaw, ruahmanna fel fai tawk emaw siam a ni loh chuan a man pek tur a sang hle mai thei a ni, a ti. Afghanistan ram chu firfiakte tan pawikhawihna thlenna ruahmanna tur hmun remchangah a chan chhoh leh mai a hlauthawnawm hle a sawi. 

Afghanistan ramah hian NATO hian sipai 12,000 vel a la dah a, Afghan security force-te training an pe ṭhin a ni. NATO sipai zingah a zahve aia tam hi US ni lo, ram dang aṭanga kal an ni a, mahse transport, air support , logistic leh kawng dang dangah US kutah an innghat lian hle thung. US puihna tel lo chaun NATO tan hma lak chhunzawm a har hle rin a ni.