Raltlan an pung zel

Ukraine aṭangin raltlan an pung zel a, Russia-in Ukraine a run ni 11-na, nimin Pathianni khan raltlan mi maktaduai 1.5 an tlin chhoh rin a ni.

Ukraine aṭanga tlanchhia zinga a tam zawk hi Poland, Romania leh Slovakia ramah an kal a ni. Germany chuan Ukraine aṭanga tlanchhia chu eng ram mi pawh nise an ramah an lalut dawn tih a sawi. Germany-ah hian raltlan 30,000 vel an lut tawh a ni. Berlin khawpuiah chuan state centre te, hotel room leh biak-inte chu Ukraine raltlante awmna tur hian ruahman a ni.

Vawiinah Russia-Ukraine aiawhte inbe leh dawn
Russia leh Ukraine aiawhte chuan indona tihtawp a nih theih dan ngaihtuahin vawiinah inbiakna an nei leh dawn a, hei hi indo a thlen hnuah inbiak an neih ṭum thumna tur a ni.

Ukraine palai David Arakhamiya chuan inbiakna an neih leh tur thu hi a Facebook-ah tarlangin, a hmun tur erawh a sawilang lo.

Kar liam ta Ningania ram pahnih aiawhten inbiakna an neihah khan, indona bial chhung aṭanga civil mite him taka an tlanchhuah theihna tura humanitarian corridor siam an lo remti tawh a, mahse a taka kalpui erawh a la ni lo a ni.