Russia president hlui leh an chhungte humhimna tur pawm

Russia Parliament lower house, Duma chuan Russia president hlui leh a chhungte thubuai siamsak an nih theih lohna tura humhimna tur bill siam chu a pawm.

He bill hi kumin July thlaa ram danpui siamṭhatna tura pawm zingah khan telh a ni tawh. 

Parliament in hnihah hi President Vladimir Putin thlawptuten an thunun ve ve a ni. 

Putin hian President term lina a hmang mek a, kum 2024-ah a tawp ang. Mahse danpui siamṭhat hnuaiah hian term hnih dang President dinhmun hi a la chuh leh thei dawn a ni. Tunah hian kum 68 mi a ni tawh a ni. 

Duma-ah hian bill hi chhiar chhuah a nih  hnuah pass nghal a ni a, MP tam zawk hi Putin thlawptu United Russia party member an ni. Hetih lai hian bill duh lo lamah Communist MP 37 in an vote ve bawk. Duma-ah hian ṭum hnih dang ngaihtuah leh a ni ang a, chu mi hnuah upper house, Federation Council-ah thawn niin, an lo pawm hnuah Putin hian a hming a lo sign hnan tawh dawn a ni. 

President hlui leh a chhungte humhimna tur ruahmanna siam hnuaiah hian, police-ten thu an zawhfiah thei lo a, an in leh lo dapsak leh laksah pawh theih a ni lo ang. An dam chhungin pawikhawihna kaihhnawih thilah thubuai siamsak theih an ni dawn lo a, mahse hei hian ram phatsantua puhna leh eng emaw bik thil erawh a huam lo thung. 

Tunah hian Russia ramah hian President hlui damlai chu pakhat chauh, Putin-a thawhpui Dmitry Medvedev a awm a ni. Soviet Union hunlaia president lo ni tawh, Mikhail Gorbachev erawh chu  he humhalhna dan hian a huam lo ang.