UK-ah Covid-19 vanga thi tam ber ni thleng
UK-ah Thawhlehni khan Covid-19 vanga thi mi 598 an awm a, May 6 hnua ni khata Covid-19 vanga thi tam ber ni a ni.
UK-a Covid-19 thihpui hi mi 52,745 an tling tawh a ni. Thawhlehni vek khan hri kai hmuh chhuah thar mi 20,051 an awm a, anni nen hian UK-a hri kai tawh zawng zawng hi mi 14,10,732 an tling tawh bawk. England-ah chuan hri kai an tam vangin lockdown kalpui mek a ni a, he lockdown hian December 2 thleng a awh ang.
Scotland-ah inkhuahkhirhna hmang dawn
Scotland first minister Nicola Sturgeon chuan Thawlehni khan an rama council 11-ah inkhuahkhirhna khauh tak hman a nih dawn thu a sawi a, he inkhuahkhirhna hian Zirtawpni zan dar 6 aṭangin December 11 thleng a awh ang.
Scotland-a inkhuahkhirhna thar hman turah hian pub, restaurant leh gym-te chu khar tur a ni a, school erawh hawn a ni thung ang. Hei bakah hian mamawh chakkhai tih loh dawr ho chu khar tur a ni bawk. "Hmun ṭhenkhatah chuan hri kai an tam lo a, hri inkai darhna pawh a pung lo a ni. Mahse hetih rual hian hmun ṭhenkhatah chuan hri kai an tam a, hei hian midangte a kaichhawn theih avang leh kan rama hri kai an pun loh nan inkhuahkhirhna hi kan hman a ṭul ta a ni," tiin Sturgeon chuan a sawi.
UK sorkar chu England-a lockdown puan leh hman chungchanga thuneitu a ni a, public health chungchangah chuan Scotland, Wales leh Northern Ireland-ah erawh thuneihna a nei lo thung.
US-in Covid-19 self-testing kit pawm
US Food and Drug Administration chuan minute 30 chhung a result hriat nghal theihna, mahnia Covid-19 in test-na, self testing kit chu Thawhlehni khan a pawm.
Single-use test kit hi Lucira Health siam a ni a, health care provider-ten Covid-19 kai nia an rinhlelh, kum 14 chin chunglam chuan he test kit hmang hian mahnia nasal swab sample inlakin an in test thei dawn a ni.
FDA commissioner Stephen Hahn chuan test kit hi hospital leh care centre dangah pawh hman theih a ni tih a sawi a, mahse test ngai zinga kum 14 hnuai lamte sample chu healthcare worker-ten an laksak a ngai thung ang, a ti.